علاقة برازيلية

كانت أول تجربة ... كنت متردد ومابعرف إذا يلي عم بعمله مظبوط ولا لأ ....بعتقد ما كان بدي اختبر شي مالي فيه بس صار يلي صار... كانت غريبة بشكل محير، صحيح حسيت بدفئ بس مش بالنشوة يلي العالم بتحكي عنها... بتذكر أول ماشفايفي لامستها وابتدت حرارتها تتغلغل فيي شوي شوي وقتها سرحت وحسيت براحة مميزة وتناغم عضلي عصبي رهيييب... الخلاصة بعد خمس دقائق خلص كلشي ..وفجاة وعيت وكأني كنت بمنام ..حسيت حالي رخيص لأني انجريت وراها وقررت تكون هي أول مرة وآخر مرة، بس تاني يوم الصبح اشتقتلها وبيني وبينكون مافرقت تفكيري هداك اليوم أبداً، وقتها قلت معليش مرة تاني بس لاتأكد من مشاعري ... وشوكانت النتيجة ....صرلنا سبع سنين وبعدنا منتلاقة كل يوم الصبح وبعد الظهر .... اي نعم هي حكايتي مع القهوة

تأملات ليلية

ياالله ما أحلى الليل بتشرين مع ألحان النسمة الباردة على أوتار صمت الليل ... وحرارة فنجان الشاي يلي بتعطي طمئنينة غريبة من نوعها؛ تطلعت لفوق وفجأة وقف الوقت وحسيت حالي طاير بعتمة السما بين نجوم الكون يلي بجمالها بتخلي الكافر مؤمن والملحد موحد .. النجوم يلي عم بتغني لبوكرة أحلى ولمستقبل من غير حدود وبلا فواصل وأنا طاير شفت القمر بضحكة خيالية عم تهمس أمل وحنان وبتنسي هموم الأيام.. وللحظة حسيت إنه هالمشهد مش غريب وسبق اني عشته قبل هيك.... إيييييييه اتذكرت .. ياالله عيونها كانت عم اتغني متل النجوم وضحكتها متل ضحكة القمر إلا إنه الأمل الأكبر وبين عيونها وبسمتها كان في خيال حزن قديم عم ينبع من نهر شوق وغربة .... ياترى منشان هيك سموها ليالي ؟